[] ســــــــرافــــــــيـــــــــس []

[امير الظلام]

تقريبا ... لا يوجد احد من بيننا لم يستعمل يوما المواصلات العامه
عندما تجلس في الباص .... توقع ان يجلس بجانبك أي شخص
قد تجلس بجانب طبيب ، مزارع ، مهندس ، طالب عادي ، شخص امي ....
كل شيئ ممكن في الباص .... الناس سواسيه ....
مرات ما بيكون جاي ع بالك تحكي ...
بس اللي جنبك فجأه بينطلق لسانه .... وانت بتبتسم ببرود وبينك وبين حالك ..
ولك اسكت يا ...
هذا فيما لو جلست ... لانه كثيرا من الاوقات بتكون في الباص عالواقف
طبعا اذا كنت بنت فليس من الممكن انك تطلع بالباص عالواقف .... ليش ؟؟
والله مش لانه الشباب نخوجيه .... غالبا لانه بيكون الكونترول عضلنجي
والله معطيه الصحه
مجرد ما يجحرك ... قوم ابو الشباب قعد البنت
بتلاقي نفسك قايم وبكل صدر رحب ....
او لاسباب اخرى كلنا نعرفها
خصوصا اذا كانت البنت ( حلوة )
بهاي الحالة يتسابق الشباب
حتى تقعد مكانه .. عشان يضل يبصبص طول الطريق عليها

عشان هيك لما أي شب يطلع يقعد بالباص بيحاول يقعد بمكان صعب أي بنت تقومه فيه ...
مثلا بقعد على البسطه ورا الشوفير ... او بالكرسي الخلفي مع اربع شباب ...
او الكرسي اللي جنب الشوفير ... هيك بيكون استمتع بالرحله ... ولا بنت ابوها بتقومه ؟؟
السؤال اللي بطرحه اغلب الشباب بينهم وبين حالهم ... وهمه بيصرو على
سنانهم من القهر بس مش قادرين يحكوا لانه الكونترول معلم بوجهه موس
من الذان للشفه .
السؤال هو : يا ابن ..... ما انت شايف الباص مليان ليش بتطلع بنات
... عشان تقعدها مكاني ....
هاي المشكله اللي مش راح تنتهي ..
طبعا هاذا انسى المشاكل والواحد واقف ..
يعني اذا الباص لف كوربه محترمه بتلاقي المسكين بيترتح باي اشي عشان ما يوقع ...
واذا دعس بريك فجاه ... يا بتوقع على الارض يا بحضن الكونترول ..
ومرات بتكون واقف ... بتبلش تتعود على الوقفه ... بتستقر امورك .. وبتبدا تحاول تستمتع ...
فجاه بتسمع صياح الشوفير ... : دوريه اقعد اقعد يا ابو الجوكيت البني .... نزل راسك ...
بتضطر انك تقرمز وتوطي راسك كانك عامل عمله ...
وكل ما بده واحد ينزل لازم تنزل معو ع بين ما ينزل وترجع تطلع مره ثانيه ...
ومرات بس تنزل بيكون واحد بده يطلع وفعلا بطلع قبلك وبيقعد عالكرسي اللي فضي ....
بس ما بتقدر تفتح ثمك ....
وكلو كوم ولما يبلش الشوفير والكونترول يسولفو مع بعض ويعرطو كوم
حجم هائل من الزناخه ما بتلاقيه بالمحيط الاطلسي ....
واشي انا مستغرب منو ... الاغاني اللي بيحطوها الشوفيريه بالباصات
من وين بيجيبوها ؟؟؟
يعني يا بيحط ربابه وواحد بيجاعر .....
يا اغنيه من سنة الف وتسعميه وخشبه .... من الاغاني اللي كان يسمعها خفرع ومنقرع ..
وغير هيك السباقات اللي بتصير بين الشوفيريه ....
يعني الشوفير مستعد يشطب 25 واحد عشان راكب بخمسطعشر قرش ...
وفيه نكته عالموضوع بتحكي انه فيه شوفيريه باصات ثنين بتسابقوا .
اللي قدام شاف راكب
صار يفكر ... اذا وقفتله اللي وراي بسبقني عالمجمع وبيحمل قبلي
واذا ما وقفتله اللي وراي بوقفله وهو اللي بوخذ البريزه ... شو اعمل ...شو اعمل ؟؟
احسن حل ادعسه ... وعننننننننننن ...... اخبط !!!!!
بالمانيا ... كان كل خمس دقايق ييجي باص ...
كنت اشتري بطاقه بتسمح لي اركب عشر مرات ... كنت اركب واختم البطاقه
اقعد بمكاني ... ما فيه لا كونترول ولا حدا بيصيح .. فيه سوفت ميوزيك
الشوفير لا بحكي معك ولا بتحكي معو ...
بينزل بمحطات معينه .... الباص نظيف من جوا ومستحيل تتعدى سرعته ستين
وما بيطلع عن السايد تبعو وما بيتجاوز
واحلى اشي انك لما تنزل من الباص الشوفير بيستناك لما تنزل ويسكر
الباب وبعدين بيمشي .. مش زي عنا بتلاقي راسك برا واجرك جوا والباص
ماشي وانت يا بتكون قد حالك وبتطلع .. يا اما على صباحك ... وعلى المستشفى
وبامريكا نفس النظام .. بس هناك انه لما تنزل من الباص بيبتسملك
الشوفير ابتسامه عريضه
وبيقولك ثانك يو فيري ماتش ... هاف أ نايس داي ..
سبحان الله ... زي شوفيريتنا بالزبط ...
يا خالي بسرعة ... زيحو للبنات ... بسرعة يا ..... حدا نازل ع الاشارة ...
غير المدافشه ربع ساعه قبل ما تطلع بالازمه .... واذا ما فيه ازمه
استنى نص ساعه عبين ما يعبي الباص ... وزلمه افتح ثمك واحكي مستعجل
اما بالنسبة لشغلة الاجرة
فحدث ولا حرج
برايز .. برايز .... ويا ويلك اذا ع الريق بتطلعلوا الليرة
وبتكون امك داعية عليك اذا كان معك ( الخمسة او العشرة )
والله الكنترول طخه ولا تورجيه حمرة ولا زرقة ع الصبح
ولا بتراولوا يزتك من الشباك انت وخمستك
واذا اخذها
استنى عاااااااد ليرجعلك الباقي ... حدا الو باقي
( عبارة تقال بالباص ما يقارب الــ 1.000.000 ) مرة في كل طلعة
وبكل مرة انت بترفع ايدك .. وما بتوخذ اشي الا لتوصل ع المجمع
واستنى عاد ليصرف ابو الشباب ويجيك
بتكون المحاضرة راحت عليك وانكحشت من الدكتور
والدكتور مش عارف المعاناة اللي بتمر معانا يوميا
في سبيل الوصول بالوقت المناسب للمحاضرة
وبالاخر .... الدكتور بقلك ... اطلع برة
على كل حال ....
فيه رب كبير .... وكل ظالم اله يوم ...

وصباح الخير يا وطني

اخوكم: محمد الزعبي

[Destroyer]

واذا دعس بريك فجاه ... يا بتوقع على الارض يا بحضن الكونترول ..

يا زلمة اشي بخزي هالباصات

بس ما النا غير نقول لا حول ولا قوة الا بالله
خاصة برمضان
ما بعرف اشي اسمه مطب

وبعدبن يوم يحمل يادة
المقعد 3 بصير فيه 3 و المفرد بصير فيه 2 والاخير 5 او 6 حسب الحالة الموجودة ناصح ولا نحيف
عند الشوفير فوق المحرك 3 اثنين وجهم لاخر الباص وواحد وجه للمقدمة وبتلاقية وجه ملزق بالزجاج الامامي
طبعا بالكارادو بس 10 الى 15

يعني ناس مكومة فوق بعض زي الخرفان
لا حول ولا قوة الا بالله

[نسرين أحمد]

بتكون المحاضرة راحت عليك وانكحشت من الدكتور
والدكتور مش عارف المعاناة اللي بتمر معانا يوميا
في سبيل الوصول بالوقت المناسب للمحاضرة
وبالاخر .... الدكتور بقلك ... اطلع برة
على كل حال ....
فيه رب كبير .... وكل ظالم اله يوم ...

ههههههههههه موضوعك روعه امير الظلام
ويالي بتحكيه من الواقع وكلنا عايشنه.. خصوصا برمضان المواصلات بهدله

يسلمو على الموضوع
p.s
اسمك غريب امير الظلام غامض وبصراحه بيخوف :eh_s(2

):

[Orwah]

موضوع حلو مشكور
بس حاب اضيف شغلة
اعظم امنية للكنترول شو هيه يا ترى
انا سالت كنترول
حكالي يصير شوفير على نفس الباص

[احلام]

يسلمو امير الظلام على موضوعك المميز
طبعا اذا كنت بنت فليس من الممكن انك تطلع بالباص عالواقف .... ليش ؟؟
والله مش لانه الشباب نخوجيه .... غالبا لانه بيكون الكونترول عضلنجي
والله معطيه الصحه
مجرد ما يجحرك ... قوم ابو الشباب قعد البنت
بتلاقي نفسك قايم وبكل صدر رحب ....
او لاسباب اخرى كلنا نعرفها
خصوصا اذا كانت البنت ( حلوة )
بهاي الحالة يتسابق الشباب
حتى تقعد مكانه .. عشان يضل يبصبص طول الطريق عليها

هالظاهره موجوده ومؤذيه جداً.. ولكن البنت ما بتقدر تعمل اشي.. لانه لازم تطلع بالباص
ومرات كثير لو توقف البنت بالباص بيكون احسن من انها تتعرض لكلام الكونترول وتليقات بعض الشباب.. حتى الشب يالي بيقوم عنها ما ظل غير يحكيها انا قمت عنك .. وبدي اتعرف عليكي..
بس الكنتروليه مش كلهم مثل بعض فيه نسبه م كويسه منهم اولاد عالم وناس.. والشباب لسا النخوه
مرات بتجي عندهم .. بس مو للنخوه ذاتها.. الا من رحم ربي.. وسامحوني
امير الظلام لا تحرمنا من مواضيعك المميزه .. بانتظار جديدك
اختك احلام

[امير الظلام]

مشكورين كل الشكر عللا المشاركة الطيبة
واوعدكم بالمزيد ان شاء الله

Destroyer
مشكور على الرد وتقبل تحياتي

نسرين أحمد
واقع مر اختي العزيزة نعيشه كل يوم ولمدة خمس سنوات تقريبا
الا اذا اشتريت سيارة الله كريم

وبالنسبة لاسمي
انا اخذته منفيلم عادل امام ( أمير الظلام )
لانه هذا الفلم اثر في كثير وحبيته ولا يمر يوم الا وبحضره
ولا بخوف ولا اشي واذا بدك بغيره انت أأمري بس
تقبلي تحياتي

Orwah
اضافة حلوة منك
ومشكورة على المرور الجميل

احلام
اختي العزيزة
بالنسبة لموضوع انو الشب يقوم علشان اي بنت
انا بالنسبة الي صار الموضوع اشي عادي
او بالاحرى من زمان الموضوع عادي بالنسبة الي
لانو هاي عاداتنا وهذا ديننا
وشكرا على الرد الجميل

وكل عام والجميع بالف خير

[down_street]

مش طبيعي الوصف الجمال للموضوع و عنجد بحييك
وانا شو اقول عن حالي يا مان صارلي 5 سنوات و بعاني من هادا الموضوع
ولا تنسى هالشارع الملعون اللي صرنا نمر منه كل يوم
مطبات مطبات مطبات مطبات

بس نفسي اعرف ليش احنا زي الخرفان
ياخي باقي الجامعات مش هيك

انا ما بقول انها مش موجودة عند باقي الجامعات
بس اخف من عنا

والله يبعدنا عن هالكلية الملعونة

[حلم حياتي]

مشكور يا امير الظلام على الموضوع والوصف الدقيق للحال الي بعاني منه نص المجتمع
انشالله بتفرج

[Abdallah Qasaimeh]

والله معاناه يوميه

بعين الله!!

[بدون تعليق]

مشاركه جميله من وحل الواقع