مقالة بعنوان ( حكاية يوم جمعه )
اكتب لكم من مقتنيات تفكيري ,واتمنى ان اكون صريحا صحيحا

صدقوني احترت من وين بدي ابلش اكتب .
بس بدي اسأل سؤال : مين ما بعرف طابور الفلافل يوم الجمعه ولا طابور المخبز ؟

يوم الجمعة المباركه هو يوم نسمات رائحة الفلافل في الصباح الباكر تتسرب بين شوارع الحارات ,

هو يوم رائحة الخبز المخبوز بجِد خبز المشروح والورده خبز تعشق تتنفس محتواه ,

هو يوم منقوشة الزيت والزعتر من المخبز هو يوم الكعك الي كان على حرف اس بالانجليزي مسمسم ,

هو يوم طابور الفلافل من المطعم المجاور وحرب الحمص والفول المدمس الي عليه زيت زيتون صافي .
وعندك بخمسطعش فلافل يا معلم ..

هو يوم بيبدء بلعبة كرة قدم مزعجه قدام دور الحاره من الساعه 8 الصبح ونشاط مش طبيعي .

يوم الجمعة بعد الصلاة كل الناس بتشوف بعضها بوجه حسن وابتسامه مشرقه وتماسك اجتماعي حقيقي لا شك فيه .

هو يوم الطبخ الاسبوعي والمقلوبه مع الدجاج بتصدر القائمه
مع الزهره والبطاطا وبتعطيها مع اللبن او السلطه .

يوم لمن تمر من الحاره الساعه 2 الضهر 99% من ولاد الحاره رايح يشتري لبن من الدكان .

كنت تتنشق رائحة الطبخ تتسرب عبر شبابيك الجيران
هو يوم تنظيف السطح والبيت والسجاد يعتلي اسطحة المنازل
,,
هذي حكايه مختصره لمئات الاشياء الي كانت تصير يوم الجمعه ولكن ايش الي حصل وتبدل بعد سنوات.

كبرنا واختفت الاشياء وبدءة المضاهر تغطي على الحقيقه

والناس صارت مقالب لقوالب ما بتعرف خيرهم من شرهم .
الاسعار بالعلالي والحال صار بالماده والمعنويات هبطت واليوم بعد صلاة الجمعه بتقدر تقراء على وجوه الناس صعوبة مزاولة الحياه

ضاعت البسمه عن الوجوه وعلامات التعجب والحيره تصدرت وجوهنا واعتلت ضهورنا وكاننا دمى بتتحرك او هيكل فاضي

العيشه غليت وطابور الفلافل صار يتقلص شوي شوي ولو في طابور فلافل بتلاقيه بدون حوارات واجتماعيات وكلو الواقفين فيه ملتزمين الصمت وكنهم متخاصمين والسبب قلة الثقه وعدم الشعور بالامان يمكن !!!

مع الغلاء المعيشي المقلوبه صارت بطاطا وزهره بس واذا الدجاج توفر بكون اول الشهر .وطابور المخبز اختفى وبطل حد يعمل منقوشة زيت وزعتر وطعم الخبز راح واختفى رونق الخبز وريحتو الي كانت تنتشر بين البيوت والحارات ,

كبرنا وتزوج منا الاغلب وزاد الهم هم فوق هم
واختفت الاجتماعيات وتبدل معناها بالمصالح وصار الهم لقمة العيش لدرجة انو لو جلس 2 مع بعض قدام بيتهم 3 ساعات بيحكو عن الغلا وعن الديون والمشاكل لمدة 4 ساعات .

يوم الجمعة اليوم صار يوم وسط البلد والثوره والحكي الي بوجع الراس

زمان يوم الجمعه كنا نحضر كان يا مكان على قناة سوريه بس اليوم صرنا نحكي سوريا زمان كان وكان

زمان خبر ابو زياد المومني والولد الي اسمو عدي حسب ما اذكر قوم البلد وما قعدها وما نمنا الليل من وراه وجريدة شيحان كانت و وحش بلعما كانت مصدر رعب وعدو لذوذ لاحلامنا الطفوليه

والله بتذكر اني ما نمت من ورى قصة وحش بلعما

الاخبار اليوم قضت علينا شوشتنا هلكت افكارنا غيرت مسارنا وقتلت الحس الانساني الي فينا وبدل ابو زياد المومني صار ملايين والولد عدي صار مليارات وحسنا ما تحرك ولا مشاعرنا حتى والله ما بعرف ايش الي صار

خلصت وانتهت حكاية يوم الجمعه بين هموم الحياه ومشاكل الدنيا ولقمة العيش والفقر والفساد

بس بقي شي واحد متعلق بيوم الجمعه الي هو الصلاه ونفوس الناس تغيرت

احنا على اعتاب النهايه ولكل نهايه بدايه وهذي بداية النهايه
هذا ما خطر ببالي
سعودابوحنك
اليوم الجمعه 08\11\2013