المقلوبة
المقادير:
دجاجة
بيتنجان (باذنجان)..أسود عجمي
زهرة
فلفل
ملح
ماجي
رز
طريقة التحضير..
بنجيب طنجرة توسع الجاجة...
بنحط بقاعها شوية زيت ونص بصلة مقطعة دوائر ورشة بهارات ..بالعربي عدة الزنخة..
وبنحط فيها الجاجة..وبنقلبهم شوي لحتى الجاجة يصير لونها ابيض..يعني حركة دقيقتين ل3
وبنحط عليها مي ساخنة شوي لحد فوق الجاجة بشوي..
وبنسلق الجاجة لحد ما تستوي..يعني لمن عضم الفخذة يبين(او تشد اللحمة)طبعا مش الكل بعرف هاد الاشي الا ستات البيت الصح متلي
استوت الجاجة..بنزلها عن النار..
وبنكون قالين البيتنجان والزهرة..وما حد يحرقهم...بدياهم شقر..بيجننو
وبنبلش تصفيط
اول اشي بنحط بقاع الطنجرة الجاجة...وبتكون النار شغالة تحتيهم وبنبلش تصفيط..
الفخاذ..وجهم على قاع الطنجرة...وكمان السفاين..عشان يتحمروا..
والظهر والجنحان كذلك الحال..
بعد هيك بنحط البيتنجان والزهرة...
وبيكون عندنا اشكاهم طبقات..
هلا الرز حسب عدد الاشخاص..
بعد ما نكون ناقعينه وغاسلينه ومزبطينه مزبوط...
بنبلش عيار..
بنصير نعبي بكاسة ونحط بالطنجرة ونعد..
بس نخلص من الرز بنجيب فرضتين ماجي وبنفتركهم...وبنحطهم على الوجه..
ما حدى يحكي انو الماجي..مش ضروريلا عشان الرز يطلع زاكي لازم نحط..
هلا اجى دور مية الجاج...
نفس حركات الرز..
بنعبي بنفس الكاسة بنفس عدد كاسات الرز بنحط مي..
واذا نقص بنجيب مي فاترة..
العادة عيار المي عند ست البيت بحطت اصبعها...هون ما حدى يحط اشي
عيار المي نفس حجم الرز...وما حدى يحكي غير هيك..
هلا بنرش ملح
فلل
بهارات والذي منو...
وبنغطي الطنجرة..
بعد خمس دقايق بتنشف المي عن وجه الرز وببلش صوت بقبقة..
بنحرك الرز الي على الوجه بطريقة فنية ومرتبة وبدون ما نعجق الرز..عشان الملح والماجي
وبتغطي ..
كيف بنعرف انو استوى ومتى؟؟
بنحط معلقة الخشب..من جنب وبنحاول نكشف عقاع الطنجرة..مو القاع القاع..
بس قريب منو اذا كان فيه شوية مي عوشك يخلصو...
ساعتها اطفي النار واتركي الطنجرة عشر دقايق لحتى الرز يتشرب المي..
وبالوقت هاد بروح بفرم سلطة من الاخر وصحتين وعافية
