الباصات و الحقيقه المره

[أميرة قوس النصر]

[align=justify][align=center]تقريبا ... لا يوجد احد من بيننا لم يستعمل يوما المواصلات العامه
عندما تجلس في الباص .... توقع ان يجلس بجانبك أي شخص
قد تجلس بجانب طبيب ، مزارع ، مهندس ، طالب عادي ، شخص امي ...
او قد تجلس بجانب استاذ جامعي ...
كل شيئ ممكن في الباص .... الناس سواسيه ....

مرات ما بيكون جاي ع بالك تحكي ...
بس اللي جنبك فجأه بينطلق لسانه .... وانت بتبتسم ببرود وبينك وبين
حالك ..
ولك اسكت يا ...
هذا فيما لو جلست ... لانه كثيرا من الاوقات بتكون في الباص عالواقف
طبعا اذا كنت بنت فليس من الممكن انك تطلع بالباص عالواقف .... ليش
؟؟
والله مش لانه الشباب نخوجيه .... غالبا لانه بيكون الكونترول عضلنجي
والله معطيه الصحه
مجرد ما يجحرك ... قوم ابو الشباب قعد البنت
بتلاقي نفسك قايم وبكل صدر رحب ....

عشان هيك لما أي شب يطلع يقعد بالباص بيحاول يقعد بمكان صعب أي بنت
تقومه فيه ...

مثلا بقعد على البسطه ورا الشوفير ... او بالكرسي الخلفي مع اربع
شباب ...
او الكرسي اللي جنب الشوفير .. هيك بيكون استمتع بالرحله .. ولا
بنت ابوها بتقومه ؟؟

السؤال اللي بطرحه اغلب الشباب بينهم وبين حالهم ... وهمه بيصرو على
سنانهم من القهر بس مش قادرين يحكوا لانه الكونترول معلم بوجهه موس
من الذان للذان
السؤال هو : ما انت شايف الباص مليان ليش بتطلع بنات. عشان تقعدها مكاني ....

هاي المشكله
اللي مش راح تنتهي ..

طبعا هاذا انسى المشاكل والواحد واقف ..

يعني اذا الباص لف كوربه محترمه بتلاقي المسكين بيترتح باي اشي عشان
ما يوقع ...
واذا دعس بريك فجاه ... يا بتوقع على الارض يا بحضن الكونترول ..
وهذا ما يتمناه الكونترول ...

ومرات بتكون واقف ... بتبلش تتعود على الوقفه ... بتستقر امورك ..
وبتبدا تحاول تستمتع ...

فجاه بتسمع صياح الشوفير ... : دوريه اقعد اقعد يا ابو الجوكيت البني.. نزل راسك ...
بتضطر انك تقرمز وتوطي راسك كانك عامل عمله ...
وكل ما بده واحد ينزل لازم تنزل معو ع بين ما ينزل وترجع تطلع مره
ثانيه ...
ومرات بس تنزل بيكون واحد بده يطلع وفعلا بطلع قبلك وبيقعد عالكرسي
اللي فضي ....
بس ما بتقدر تفتح ثمك ....

وكلو كوم ولما يبلش الشوفير والكونترول يسولفو مع بعض ويعرطو كوم

حجم هائل من الزناخه ما بتلاقيه بالمحيط الاطلسي ....

واشي انا مستغرب منو ... الاغاني اللي بيحطوها الشوفيريه بالباصات


من وين بيجيبوها ؟؟؟

يعني يا بيحط ربابه وواحد بيجاعر .....
يا اغنيه من سنة الف وتسعميه وخشبه .... من الاغاني اللي كان يسمعها
خفرع ومنقرع ..

وغير هيك السباقات اللي بتصير بين الشوفيريه ....
يعني الشوفير مستعد يشطب 25 واحد عشان راكب بخمسطعشر قرش ...

وفيه نكته عالموضوع بتحكي انه فيه شوفيريه باصات ثنين بتسابقوا .
اللي قدام شاف راكب
صار يفكر ... اذا وقفتله اللي وراي بسبقني عالمجمع وبيحمل قبلي
واذا ما وقفتله اللي وراي بوقفله وهو اللي بوخذ البريزه ... شو اعمل
شو اعمل ؟؟
احسن حل ادعسه ... وعننننننننننن ...... اخبط !!!!!



بتركيا ... كان كل خمس دقائق ييجي باص ...
كنت اشتري بطاقه بتسمح لي اركب عشر مرات ... كنت اركب واختم البطاقه

اقعد بمكاني ... ما فيه لا كونترول ولا حدا بيصيح .. فيه سوفت ميوزيك

الشوفير لا بحكي معك ولا بتحكي معو ...

بينزل بمحطات معينه .... الباص نظيف من جوا ومستحيل تتعدى سرعته ستين
وما بيطلع عن السايد تبعو وما بيتجاوز
واحلى اشي انك لما تنزل من الباص الشوفير بيستناك لما تنزل ويسكر
الباب وبعدين بيمشي .. مش زي عنا بتلاقي راسك برا واجرك جوا والباص
ماشي وانت يا بتكون قد حالك وبتطلع .. يا اما على صباحك ...

وبامريكا نفس النظام .. بس هناك انه لما تنزل من الباص بيبتسملك
الشوفير ابتسامه عريضه
وبيقولك ثانك يو فيري ماتش ... هاف ا نايس داي ..

سبحان الله ... زي شوفيريتنا بالزبط ... : يالله انزل وله

غير المدافشه ربع ساعه قبل ما تطلع بالازمه .... واذا ما فيه ازمه
استنى نص ساعه عبين ما يعبي الباص ... وزلمه افتح ثمك واحكي مستعجل


على كل حال ....

فيه رب كبير .... وكل ظالم اله يوم ....[/align][/align]

[mylife079]

والله انا من سكان ايدون

كلامك مها كله واقعي

بس البنت بظل وضعها غير

من باب الاحترام الشب لازم يكون نشمي

ويقعد البنت مكانه

[M7MD]

الله .......... عليك
عشت الدور منيح و أنا بقرأ

زي ما حكيتي في ألنا رب

فكرك ممكن واحد من المسؤولين رح يسمع في يوم من الأيام؟

بتصور كل مسؤول في البلد ما بعرف هاد الحكي أو بعرف و مطنش

و يمكن أله دور كبير أنه هاد الحكي ما يتغير و صار عندي قناعة أنه اي شغلة بتصير مش لصالح المواطن
و مش قادر حد يعدلها في من وراها مسؤول كبير ما حدا بقدر يحكي معه

مشكورة على الطرح الرائع

[The Gentle Man]

حسيت حالي بباص الحصن
يا الله شو حلم
الحمد قربت اتخرج على خير
ورح انتهي من هيك قصة واحداث

[مهدي شطناوي]

شكرا الك...كتير


بس غي بعض الشغلاات مبالغ فيها ....

مثلا موضوع انو الشب ما بقوم الا عشان الكنترول

هالشغلة بتعتمد على الشب( لو اهبل بقوم بس لو قد حالو ما بقوم)

مش قصدي انو ما يحترم البنت....بس مش انو يجي الكنترول يجحرني ويخوفني

لانو اصلا غلطان لما يحمل زيادة ...وهو بيحمل وهو خااايف...

وبضل الواحد بيفرض وجوده...

انا بحكي عن حالي

انا اذا دخلت بنت وما لقت مكان بقوم من حالي ما بستنى حد يطلب مني..........

بس عشان اثبتلك تنو كلامك في اشياء خطأ

مرة كنت معصب عالاااااخر......وبتمنى انو ما حد يحكي معي عشان ما اعمل معو هوشة

قعدت بالباص بكرسي وكان جنب بنت..(فش غير هالكرسي)..طلعت بنتين بالباص............

الكنترول بدو يكسبهم ...واحنا كنا لساتنا بالمجمع يعني مافي داعي ابدا يحمل راكب زياد لأن في 1000 باص...

حكالي بصوت عالي قوم اقعد هون(على البسطة جنب الشوفير)
قلتو مالك بتصيح..........مش قايم ومش نازل من الباص ......... فهمت.....

سكر تمو ..... وصار يقللي مش قصدي انت حبيبي ...وما بعرف شو........

فالشغلة بترجع للشب نفسو.....



بعدين انت ما حكيتي عن المقاعد الثلاثية للبنات

نفسي اشوف كرسي قاعدة عليه بنتين.... دايما كل كرسي 3 بنات........

حتى الكرسي الفردي بتقد عليه بنتين............

[الاء]

بصراحه انا ولا مره استخدمت الباصات لان بابا ما بحبها فعشان هيك مابعرف شو بصير فيها
بس بسمع من صحباتي انها كتيررررر غلبه

[أميرة قوس النصر]

طيب انتظروني في الجزء الثاني رح اتحفكم شو بصير فينا احنا البنات
ورح تحكوا ما احلى الوقفه

[The Gentle Man]

في انتظار الجزء الثاني

[عُبادة]

مشكورة مها



أحلى مهدي اقوى واحد

[Abdallah Qasaimeh]

عشان هيك لما أي شب يطلع يقعد بالباص بيحاول يقعد بمكان صعب أي بنت
تقومه فيه

صح

السؤال هو : ما انت شايف الباص مليان ليش بتطلع بنات. عشان تقعدها مكاني ....

هاذ الاشي الي قاهرني

طبعا هاذا انسى المشاكل والواحد واقف ..

آخر مره وقفت فيها أكلت هوا وحرمّت اعيدها



بعين الله