قصّة وقصيدة (حقيقية)

[مايسترو]

كان في واحد إسمه حمد وأخوه إسمه حمّاد
حمد قال لأخوه حمّاد يا خوي ما بدّك تتجوّز ؟؟
حكاله حمّاد هسّا ما بدّي خليها لبعدين
وبعد ما صار عمر حمّاد 35 سنة راح حمد قال للعبد اللي عنده بكرة الصبح بتوخذ أخوي حمّاد للصيد وبتخليه يقعد على بير الميّ بلكي يشوف وحدة من البنات اللي بيعبّوا ميّ وتعجبه ونخلص من هالسولافه لأنه أخوي كبر ولازم يتجوّز
الصبح راح العبد مع الشيخ حمّاد للصيد ومرّوا من عند البير علشان يعبّوا ميّ للشرب وبعد شوّي صارت البنات تعبّي ميّ شاف حمّاد وحدة حلوة سأل العبد : مين هاي البنت؟؟ حكاله هاي إسمها (عشبة) بنت الشيخ برجاس
راحوا للصيد وبعد ما رجعوا من الصيد سأل الشيخ حمد العبد : ها شو صار معك؟؟ حكاله العبد خلص إختار عشبة بنت الشيخ برجاس راح حمد وحمّاد لعند الشيخ برجاس بالليل وطلبوا إيد البنت وبليلة الدخلة نزل الشيخ حمّاد وصار يسأل الناس عن البنت إنها كويسة أو لأ راح سأل واحد كان بيحب عشبة بس هي رفضته وما بدها تتجوزه حكاله : شو رأيك بالبنت وهو ما بيعرف إنه هو العريس حكاله : والله لو فيها خير ما رماها الطير وصار يذم فيها وحط فيها مية علّة وعلّة
زعل السيخ حمّاد وبعد ما خلصت الدبكة والدحيّة دخل لعند عشبة ع الشِق وحكالها : أنا بدّي أروح ساعة وأرجع ما بتأخر .
راح الشيخ حمّاد وهو زعلان وغاب عن العشيرة 4 أشهر وما حدا بيعرف ليش عمل هيك
راحوا إخوان عشبة أخذوها لبيتهم لإن أبوها وأمها ماتوا وما إلها غير إخوان إثنين والشهر الخامس رجع حمّاد للعشيرة وشاف أخوه الشيخ حمد وقاله ليش عملت هيك يا حمّاد فضحتنا شو شفت ع البنت إشي البنت فيها عيب ؟؟ حكاله لأ ما فيها إشي بس هيك اللي صار
راح الشيخ حمد وعمل جاهة ورجّع البنت لجوزها بعد صلح وقعدة طويلة
بس إخوانها كانوا زعلانين وحاقدين على حمّاد وبعد شهرين راحوا إخوان البنت وحكوا للشيخ حمد بدنا أختنا تيجي عنّا ع البيت علشان تطبخ وتنظف البيت لإنهم كانوا ساكنين ببيت من طين وكانوا معمرين طابقين فراحت البنت مع إخوانها وبعد أسبوع راح إخوانها وسرقوا الحلال والغنم من عند الشيخ حمّاد ثاني يوم شاف الشيخ إنه الغنم إنسرق ركب على الفرس وراح يشوف مين اللي سرقوا وهو بالطريق شاف إخوان البنت قاعدين ع الطريق مسكوه وحكوله من زمان بدنا تشفي غليلنا منك إحنا ما بدنا تذبحك بس بدنا نعلّمك ونربيك راحوا مسكوا إيديه وقطّعوهن من عند الكوع وتركوه بالبريّة مرمي أخوه حمد لحقوا بعد ساعة وشافه مرمي والدم بيشّر منه حكاله مين اللي عمل فيك هيك حكاله بعدين بحكيلك بس إحملني ع الفرس وودّيني لبيت عشبة
حمله اخوه وراح لبيت عشبة حكاله نزلني هون وحطّ السيف على راس قلبي وإركيني عليه
راح أخوه نزلّه عن الفرس وحطّ السيف على راس قلبه وتركه رفع حمّاد راسه لفوق شاف عشبة بتطلّع عليه من الطاقة بالطابق الثاني فحكى لأخوه حمد:

يا حمد شدّلي من القاف جيدين لإنك بشدّ القاف سرعٍ ومطواعِ
وجدي يا عشبة مجد راعي القطيعين متخالفاتٍ بعد ولفهن بمرباعِ
راحن خزايز وآتلوهن عقيدين حيرانهن قدّامهن تربع رباعِ
راح خبرهن لأهلهن عقب يومين ولحقتهن ع صفرا مع الضوّ فزّاعِ
جن طالعولي إثنين طلاّبة الدين تقاطعون إيدّي من حدّ الكواعِ
بالله يا حمد إن بحشت القبر وازنو زين إرفعني عن البطحة شبرٍ وقمباعِ
بالله إن قبرتوني بين الفريقين خلّوا النصيبة طولها نايفٍ ذراعِ
بالله إن قبرتوني وعدتوا مقفيين خلّوا لنا مع القبر مطلاعِ
بلكن أحيا وأشاهد مريوشة العين اللي هوا شبّاكها يرزع رزاعِ

بعد ما خلّص القصيد رمى حاله ع السيف طلع من ظهره ومات وبعد ما شافت عشبة ه المنظر رمت حالها من الطاقة وإنكسرت رقبتها وماتت راح اخوه دفنهم بقبر واحد

وسلامتكم
/القاف = بيت الشعر /جيدين = سطرين /مطواع = حلو الكلام
/خزايز = سبايا /عقيدين = جملين /مرباع = مفرد مرابع مكان طعام الغنم
/حيرانهن = صغارهن /تربع رباعي = تركض /صفرا = الفرس الأصيلة
/البطحة = مكان الدفن /قمباع = زيادة /النصيبة = شاهد القبر
/نايف ذراع = أطول من متر /مقفيين = راجعين /مطلاع = منفس هوا
/مريوشة العين = الغالية /يرزع رزاع = يلعب لعب

[العالي عالي]

مشكووووووووووووور مايسترو على القصة الجميلة