ذكريات واحد من الزرقا (رحلة عالعقبة)
بسم الله الرحمن الرحيم
ذكريات واحد من الزرقا (رحلة عالعقبة)
عمري ما شفت البحر...وكان منى عيني اني اشوفه ولو مره واحده ..لاني بصراحه
زهقت من سيل الزرقا وواد شعيب...ونفسي اسبح بميه كبيره زي اللي بشوفها عالتلفزيون
واشوف الناس المبسوطين واللي دايما بضحكوا وبلعبوا عالبحر.... مع اني بعرفش اسبح
وسنحت لي الفرصه اخيرا عن طريق صديق الي بشتغل شوفير على بازز(باص) وقاللي انه
منظم رحله غير شكل للعقبه....والاحلى من هيك انه كل اللي طالعين معنا بالرحله بنات
ما فيهم ولا شاب الا انا وشوفير البازز....طبعا انا سالت ريالتي عالرحله واللي فيها
قلتله ايدي بزنارك يخوي انا مستعد اطلع وادفعلك اجار الرحله ان شاء الله بكلف خمس ليرات
الشوفير اتطلع فيي نظره من تحت لتحت وقال بمسخره : خمص نيرات اي هو انا ماخدك عالزرقا؟
ولك هاي بتكلف عشر ليرات حبك حبك ما حبك مع السلامه وهدا السعر لاننا قروب
طبعا العشر ليرات عندي بكسروا الميزانيه بس قلت بعقلي خليني اضحي بلكي شفتلي بنت
صبيه احبها وتحبني في هالرحله قلتله موافق بس انت منأكد انهم كلهم بنات؟
قاللي : خود هي كشف اساميهم اقراه....هدول خمسين بنت ..والله اخدت الكشف من ايده
وبلشت اقرأ وفعلا كلهم اسامي مؤنثه...وقاللي روح حضر شنطتك واكلك عشان بدنا نطلع الصبح
بدري
روحت عالدار مكيف وقعدت احضر بالشنطه وحطيت شروال السباحه وبشكير وعلبه نيفيا ومشط
ورحت اشتريت علبه جبنه البقرة الضاحكه وعلبه لحمه كسترا لاني سمعت انه العقبه فش
فيها اكل....مش عارف مين الخويثة اللي اعطاني هالمعلومه
الصبح صحيت مع الفجر ولبست وزبطت حالي ورشيت عطر ابو التلاته بليره ريحته بتشبه الفونيك
وطلعت لقيت صاحبي قاعد بالباص بستنى ...قلتله لسه البنات ما شرفوا؟
قاللي هلئيتي بيجو . استنى دقايق وبوصلوا....والله قعدنا نستنى وبعد شوي وصلت واحده ختياره
عمرها حوالي خمسه وخمسين سنه وبتجر في واحده اكبر منها الظاهر انها امها .....وامها ماسكه
ايد واحده اكبر منها الظاهر انها ستها وصرت انا اساعد فيهم عشان يقعدوا لانهم مش قادرين يمشوا
وبلشوا الباص يتعبى لكن كلهم عجايز ..يعني ازغر واحده كانت اللي عمرها خمسه وخمسين
انا الحقيقه صعقت.....الباص كله ختايره ...وصاحبي ببتسم ابتسامه خباثه قلتله ولك وين البنات؟
قالي : هيهم في الباز .كل هدول مش عاجبينك؟ ولك هدا احلى قروب
قلتله قروب ولا قرود؟ الله لا يوفقك انت رايح فينا عالعقبه ولا على ملجا العجزه؟
المهم الباص تحرك فينا واسقط من يدي...وقلت بعقلي يا ولد خلص انحسبت عليك رحله
حاول تستمتع بالمناظر الطبيعيه وبالبحر لما نوصل.....وكانت قاعده جنبي واحده ختياره ومعها
طناجر قلتلها شو فيه يهالطناجر يا حجه؟ قالتلي والله يا ابنيي فيها لبن معقود ورز مفلفل
قلتلها يا حجه في حد بوخذ معاه لبن معقود ورز مفلفل؟ معرفتيش تشتري جبنه البقرة الضاحكه؟
ولا علبه اكسترا كان احسنلك من الطبيخ...قالتلي لا يخوي انا ما بوكل نواشف
كان نفسي افهم ليش سموه لبن معقود ...بجوز لانه معقود عقد مش زينكو زي بيتنا
ووليش مفلفل الرز مش محمص او مفول...لليوم مش فاهمها هاي مع انها طبخه زاكيه وبتشبه
المنسف مع اختلاف في نوع اللبن
الباص تحرك وقعدوا النسوان يغنوا اغاني لا تمت باي صله لنانسي عجرم او هيفاء وهبي وكنت
قاعد اضحك عاللي بسمعه ولما قربنا نوصل للقطرانه طلبوا من الشوفير انه يوقف عشان بدهم
يروحوا عالحمام وطبعا نزلوا كلهم وكنت انا اساعد فيهم انهم يقوموا ويمشوا للحمام الموجود
واللي صارت تطلب مني ميه للشرب واللي صارت بدها ورق تواليت انا قلت بعقلي الرحله من
اولها....ره...المهم حاولت اني البي طلباتهم قد ما بقدر وعاودنا تحركنا كمان مره وكنت مستوي
من التطليع والتنزيل وبعد خمسين كيلو برضه صاروا بدهم يروحوا عالحمام .انا مش عارف شو
شاربين؟ .. وبلشت اساعد لانه ما هانلي فيهم ...وقضيناها طول الطريق للعقبه كل خمسين كيلو نوقف وننزلهم عالحمام
يعني الرحله كلها ما بعرف شو وانا استويت من التعب من كتر ما حملت وطلعت .كنت اشتغل زي
العتال..وطول الوقت وهن يدعولي الله يرضى عليك والله يخليلك شبابك والله يوفقك
الحقيقه انا لما شفت البحر نسيت كل التعب ...وهبت نسمات عليله انعشت نفسي وردت
فيي اروح ..يا الله ما اجمل هالمنظر ..هذا اللي طول عمري نفسي اشوفه..ووقف الباص فينا
عند شط اليمنيه....انا نزلت بسرعه من الباص بدي انزل بالميه لكن العجايز اللي معي صاروا
ينادوا علي عشان اساعدهم بالنزول واحمل اغراضهم وطناجرهم للشط وصاحبي الشوفير النذل
مش متحرك .....وطلعت الشغله كلها من كتافي ...وبعد ما نزلوا كلهم وقعدوا جنب البحر قالتلي
واحده من العجايز انها بدها تسبح ...انا الحقيقه كنت مفكر انه اي واحد بده يسبح لازم يلبس
مايوه احسن ما يغرق... المهم الختياره نزلت عالبحر بكامل ملابسها ونزلت انا اسبح باول 30
سنتمتر لانه بعد هيك بصير خطر عليي وممكن اغرق وكنت مبسوط كتير ومش سايعاني
الدنيا من الفرح وكنت كل شويه استرق النظر للقروب اللي جنبنا
وفجاه سمعت صوت الختياره اللي نزلت عالبحر بتصرخ وبتبقبق بالميه شكلها بدها تغرق
ما بعرف شو اللي صارلي .ونسيت حالي اني ما بعرف اسبح وصرت امشي بالميه بسرعه
باتجاهها عشان انقذها وصاروا النسوان على الشط يصرخوا علي عشان اطلعها بسرعه قبل
ما تغرق .وكنت انا اقرب واحد الها وصرت امشي لعندها مشي وخبطت على ابو الهيلمان
ودخل شوكه برجلي وحسيت روحي بدها تطلع لكن ضليت ماشي لعتدها لما وصلتها
وكانت الميه واصله لعند مناخيري وحسيت حالي بدي اغرق انا كمان لكن غصبت على حالي
ورفعتها وصرت امشي باتجاه الشط ورجلي شكلها مجروحه من المرجان وابو الهيلمان لحتى ما
طلعتها عالبر للختياره........لكن انا شو....ماكل روح الخل وصاروا النسوان يزقفولي ويرضوا علي
واجوا كمان تبعون القروب اللي جنبنا بدهم يتفرجوا عالمنقذ لكن انا من وجع رجلي ما كنت قادر احكي
وقعدت ابتسم ابتسامه نصها عياط.....وبرغم كل الالم الا اني كنت سعيد اني انقذت الختياره
وبعديها قعدوني الختياريات بالنص وقعدوا يغنوا الي اغاني ما فهمتها لكن كانت حلوه واكلنا لبن
معقود ورز مفلفل ...وكل شط اليمنيه اجا عنا وعملنا حفله تاريخيه وكان الكل مبسوط ويزقف
ويرقص وحست حالي زي العريس اللي بالزفه من كتر ما كانوا مهتمين فيي
في طريق العوده للباص ما كنت قادر امشي من الوجع .وهاي المره انا تعكزت على الختياريات
ووصلوني للباص مع الدعاء بالشفاء العاجل ...
نزلت على العقبه عشان افوز بحب واحده .........رجعت وقد فزت بحب خمسين واحده
.gif "SnipeR (99)")
.gif "SnipeR (35)")
.gif "SnipeR (17)")
.gif "SnipeR (92)")
.gif "SnipeR (2)")
.gif "Eh S(3)")
.gif "SnipeR (31)")
.gif "SnipeR (52)")
رد مع اقتباس.gif "Bl (11)")
المشاركة الأصلية كتبت بواسطة صديقه بنت الشديفات
.gif "SnipeR (16)")
.gif "SnipeR (81)")
.gif "Eh S(7)")
.gif "SnipeR (37)")
مواقع النشر (المفضلة)