| يوميـــــــــات عسكري | | الجزء الثاني |

[هدوء عاصف]

بسم الله الرحمن الرحيم

| يوميـــــــــات عسكري |
| الجزء الثاني |

4 حلقات تحكي قصتي في معسكرات "خدمة العلم"
الهدف منها .. النقاش حول أمور تعلمتها هناك ..

نكمل ما انتهينا به يومياتنا الحلقة الماضية ..!!

تذكير سريع .. كنا بنحكي عن العساكر وقانون الورقة ..
والعقاب المنتظر لمن خالف ..

اصطفوا طوابير المخالفين .. واجا القائد .. ونادو الحلاق يحلق لكل واحد على الزيرو..!
يحلق شعر الرأس طبعا
انا اليوم الاول ما كنت منهم ...
بس اليوم الثاني ما قمت مع الصفقة الأولى و حلقولي ...

:
:
:

وبعد كم يوم كان الشعر طلع شوي .. اجوا يعاقبوني كمان مرة ..
قعدت اضحك واقول خلص ايش بدكم تحلقوا ما فيه شعر براسي لسه .!
هههه لدرجة قعدت كم شهر ما في شعر براسي اول باول كنت احلق ههههه

:
:
:

انواع العقابات بصفة عامة في الجيش ..
الي بتأخرعن الصفقة الثانية عند الاستيقاظ
بسحبوه تحت الدش وبفتحو المية الباردة عليه
وبعدين بروح بالرمل بتشقلب فيه اكتر من مرة هو ومبلل ..
ويرجع تحت المية ثاني مرة. مشان يتحمم يعني !!

عقاب اخر .. بخلوه المُعاقب يتلحف ببطانتين كأنو بردان ..
وبخلوه يركض في الشارع ورا سيارة الجيش كيلو ..
لازم ركاض !!

عقاب اخر .. 3 بطاطين بتلحف فيها كمان ..وبطلع عالجبل وينزل ..

:
:
:

نرجع للحياة في الجيش ..

اكيد طبعا كانت غربة وبالنسبة لعمري بهداك الوقت كنت أُعتبر صغير لسا ..
كنت متعود حدا يغسلي اواعيي وحدا يحضرلي الاكل ...
والي زاد الطين بلة المعاملة السيئة والمهينة ..
وكان اللبس في الجيش اسمو أفارول
فوق وتحت قطعة واحدة ، اكيد بتعرفوه ...!

كان الافارول مقاسه موحد .. وعلي كان كبير!!!
كنت اتضايق منه وكمان البسطار (الله يكرمكم ) كان كبير !!!
والناس جديدة علي وما بعرف حدا ..

والعقابات المتتالية .. والاكل الي مش نظيف .. والقسوة والمنطقة في الصحراء .
يعني اشي بقهر وبعمل حالة نفسية سيئة

كل هالأمور عملت كبت عندي .. ومرة انفجرت بكا
من حسن الحظ وتوفيق الله. كان ابن عمتي ضابط
بس مش بنفس المنطقة منطقة بعيدة ..

اجا عنا عالكتيبة وتواسطلي بعد ما وصلته اخباري طبعا هههههه مشان يرجعوني لاهلي اسبوع بس .. اسلم عليهم بس .
طلعت طبعا ميت من الجوع .. وحاسس اني كنت مسجون وافرجوا عني ..
ميلت ع مطعم بالطريق واكلت عن عشرة
ورحت عند ستي بجبل التاج وقعدت أعيط زي الصغار وهي كمان قعدت تعيطلي ..

:
:
:

ومرق الاسبوع طيارة ..
رجعت وعاد ما الي حجة .. الى حصلت عليه ما حدا اخده !

اول ماوصلت ولسا تعبان من المشوار
اجا الضابط ..

العسكري فلان والعسكري فلان والعسكري فلان ..
يستعدوا لطلعة خاصة للمطار ..!!

طبعا ما في عندهم انك تقول انا لسا واصل وتعبان ..
ولا تقول خلي فلان يطلع بدالي .
ولا انا مش جاي على بالي اطلع ولا خليها لبكرة .... .. الأمر أمر!

الضابط بحكيلي ( بكبرياء وتأمر )
هات الافارول معاك من عند الكوّى .. (مش من حقه يطلب مني هاد الطلب )

رديت عليه بطريقة مستفزة قال : واذا ماجبته ! (نمرود)

قال الضابط: شو مالك..؟

انا : هو انا يعني كنت المراسل تبعك !

الضابط : عسكري ... اسمع الكلام ..

انا: واذا ماسمعت !

الضابط عصب .. وقام ضربني (كف) على وجهي
انا كردة فعل سريعة ..رديتله (الكف ) بس ما اجا فيه مزبوط
الموضوع كبر والناس اتجمعت ..
ولا كيف العسكري حاول يضرب الضابط !!!!

:
:
:


طلبوني عند القائد (اللواء)

سألني اللواء .. ليش عملت هيك؟
قلتله انا جاي اخدم القوات المسلحة مش جاي عفوا خدام عند حدا ..!

حضرتك تكلفني بمهمة من 6 الصبح لـ 3 بالليل ما بحكي اشي
اما واحد يحكيلي جيب الافارول والثاني يقول لمع بسطاري .. لأ ...!
انا كرامتي فوق كل شي .!!

نقلو الضابط من المنطقة وانا كمان
:
:
:

ومشت الايام ... في المعسكر الجديد

اجا الضابط تبع المنطقة الجديدة ودخل على المعسكر .. وحكى..

العسكري المستجد..!!
العسكري المستجد.!!
العسكري ابن الـ ..... (مسبة طبعا)
انا مفكر الكلام مش علي لانو كان وقتها الي 8 اشهر بالجيش

ما شفته الا وجاي عندي

قلي وقف حيلك
انا وقفت
قال قرّب جاي
وقال هات مية !

انا قلت : حاضر سيدي مع انو الزير جنبك سيدي ..

عبّيت كاسة المية ...

قام مسك الضابط الكاسة ورشقها على وجهي ..
انا وجهي احمر الصحيح !!!!!!

........... يتبع في الحلقة القادمة.. اذا شاء المولى.

سؤالين بس للنقاش

لو حدا منكم كان مكاني وتعرض لهالمواقف البايخة شو بعمل وهل كانت ردة فعلي طبيعية؟
وهل ردّة فعل بتشبة ردّة فعل اي انسان جديد على هالحياة الصعبة؟

********************************

ما هو أصعب عقاب تعاقبت فيه خلال حياتك والى الان ومش قادر تنساه .!!

...... أهلا بكم ......